Under parolen «Små ting gjorde i kjærleik endrar verda» tok elevane ved Stord kristne skule ein solid dose godleik med seg til Heiane storsenter og Sponavikjo den fyrste veka i juni.
Den årlege godleiksveka handlar om å spreia varme og visa omsut til menneska rundt seg. Elevane på SKS synte godleik ved å steikja lappekaker og dela dei ut til forbipasserande. Heile storsenteret vart fylt av ein eim av nysteikt røre, og folk strøymde til for å smaka på dei saftige kakene elevane hadde stelt i stand.
Medan somme steikte lappekaker, sprang andre rundt med godord på papirlappar. Dei fleste tok imot godorda med open famn,- somme tok til og med til tårene. Ein del andre elevar gjekk rundt og plukka bos som låg og flaut på både parkeringsplassen utanfor senteret og området rundt McDonald’s. Resultatet vart fem fulle sekkar med avfall.
Godleiken tok turen vidare til Sponavikjo eit par dagar seinare, der raking av tang, tare og anna grums stod på agendaen. Det bøtta ned frå himmelen, men det stoppa ikkje SKS-elevane frå å gjera ein innsats for medmenneska sine på Stord.
«Den største gleda ein absolutt kan ha, er jo faktisk å gjera andre glad! Det er ikkje tull, det er rett og slett sanningsord», sa ein av elevane på ungdomstrinnet etter godleiksoppdraget på Heiane.
Elevane og dei tilsette ved SKS er svært nøgde med innsatsen som vart gjord i samband med temaet godleik 2024. Me ser allereie fram til «Godleik 2025».
