Vekene før påskeferien har vore innhaldsrike for både elevar og og lærarar.
Ungdomane fekk prøva seg som gartnarar (her: tomatbønder), medan barnetrinnet var ein tur til Føyno og testa ut propellbåtane sine. Mellomtrinnet var på leirskule på Gullingen i ei vekes tid, og lærarane har stått trufaste på i si lærargjerning i tett samarbeid med assistentane på huset.
Førre veke var ekstra interessant for elevane. Den eine dagen fekk mellomtrinnet vitjing av Anne Mæland, ein utsending frå VilVite i Bergen. Ho gav elevane ein leksjon i programmering, og elevane fekk sjølv mogleiken til å programmera sjølvkøyrande småbilar. Dette skjedde ved hjelp av ein såkalla «microbit».
– Programmering er inkludert i den nye læreplanen. Me ser at programmering gjev einskilde elevar mykje motivasjon, seier Mæland og legg til at opplegget appellerer ekstra til elevar som slit med å sitja stille elles.
Mellomtrinnselevane var svært engasjerte under den tekniske undervisningsbolken.
– Det er ein av dei kjekkaste klassane eg har vore i, seier Mæland.
Så var det småtrinnet. Fredagen har vorte fast dag for utflukter, og før ferien gjekk turen til den kristelege bokhandelen SunnBok på Leirvik. Der fekk borna servert ei påskeforteljing av Silje Helen Fyllingen. Ho las for dei om palmesundagen og turen til Jerusalem frå Jesu esel sin ståstad.
Avslutningsvis vil staben ved Stord kristne skule ynskja alle ei signerik og uforstyrra påskehøgtid!
Fred etterlèt eg dykk, min fred gjev eg dykk. Eg gjev dykk ikkje fred på same måten som verda gjer det. Lat ikkje hjarta dykkar uroast, og ver ikkje motlause! – Johannes 14:27
